अमरावती एमआयडी, लाचखोर मोतीराम ढोरे एसीबीच्या जाळ्यात..!

शंकर जोगी / विदर्भदूत वृत्त

अमरावती: येथील  एमआयडीसीतील भूखंडाचे श्रीखंड खाण्यासाठी चटावलेल्या एका लाचखोर कर्मचाऱ्याला एसीबीच्या अधिकाऱ्यांनी सापळा लावून लाच घेतांना रंगेहाथ पकडले  असल्याची घटना मंगळवार दिनांक 2 फेब्रुवारी रोजी येथे घडली.

या कार्यालयात  बिनधास्त चालणाऱ्या लाचखोरीच्या रॅकेट मधील छोटा का होईना पण एक तरी 'मासा' गळाला लागला आहे.

    आलेल्या तक्रारदार यांच्या बहीणीच्या नावावर एमआयडीसी, अमरावती अंतर्गत नांदगाव पेठ येथे भूखंड आहे. वडीलांना कॅन्सर असल्याने  वैद्यकिय उपचाराकरीता पैशांची आवश्यकता भासल्याने सदरचा भूखंड परत करुन यापूर्वी भरणा केलेली रक्कम ९,३०,००० रू. लवकर परत देण्याकरीता येथील कर्मचारी ढोरे यांने २५,००० रुपये लाचेची मागणी केल्याबाबत दि. 31 जानेवारी रोजी दिलेल्या तक्रारीत म्हटले आहे.

  या तक्रारीवरून पंचासमक्ष करण्यात आलेल्या पडताळणी कारवाई दरम्यान ढोरे नामक कर्मचाऱ्याने यापूर्वी दिलेले ५,००० मिळाल्याचे मान्य करून उर्वरीत रक्कमेपैकी १०,००० रुपये आता आणून दया व बाकीचे काम पुर्ण झाल्यावर १०,००० रुपये द्या,असे म्हणून लाच रक्कम स्विकारण्याची समंती दर्शविली.

    त्यानुसार मंगळवार  रोजी पंचासमक्ष आयोजित करण्यात आलेल्या सापळा कार्यवाही दरम्यान मोतीराम माणिकराव ढोरे, (४२) पद सहाय्यक (वर्ग-३)यांने सदर प्लॉटची फाईल लवकरात लवकर काढुन देण्यासाठी १०,००० रुपये लाच रक्कमेचा पहिला हप्ता स्विकारल्याने रंगेहाथ पकडण्यात आले आहे. 

    सदर कार्यवाही मंगेश मोहोड,पोलीस उपअधिक्षक, यांचे मार्गदर्शनाखाली सापळा अधिकारी पो.नि. भारत जाधव,पो.नि.केतन मांजरे,पो.नि.संतोष तागड, पो.हवा.प्रमोद रायपुरे,पोलीस अंमलदार उपेंद्र थोरात, युवराज राठोड,आशिष जांभोळे, शैलेश कडु,पोउपनि.सतिष किटुकले यांनी यशस्वीरीत्या पार पाडली.